Rysáit

1. Cynheswch y ffwrn i 220°C/200°C ffan/nwy 7.

2. Pliciwch y tatws a’r pannas ac yna eu torri’n ddarnau a rhoi’r darnau mewn padell o ddŵr oer hallt. Dewch ag ef i’r berw a’i ffrwtian am 15-20 munud tan fydd cyllell yn pasio trwy’r llysiau’n rhwydd. Ychwanegwch y blodigion brocoli i goginio am y 5 munud olaf, eu draenio a’u gadael i stemio’n sych am 2 funud cyn eu dychwelyd i’r sosban gyda’r menyn a’u stwnshio tan mae’r cyfan yn llyfn.

3. Yn y cyfamser, mewn tun pobi, sychwch y crwyn tatws a phannas yn ofalus gyda thywel llestri glân yna ychwanegwch 1 llwy fwrdd o olew olewydd, y cwmin a mymryn o halen môr. Gwasgarwch y crwyn yn un haen a’u rhostio yn y ffwrn am 20–25 munud, gan eu troi ambell waith, tan maen nhw’n euraidd ac yn grimp, yna eu rhoi i un ochr i oeri.

4. Gostyngwch dymheredd y ffwrn i 120C/100C ffan/nwy 1.

5. Cynheswch 1 llwy fwrdd o olew olewydd mewn padell ffrio dros wres canolig, yna ffrio’r coesgyn brocoli wedi’i dorri, y shibwns a choesynnau’r persli am 10 munud tan maen nhw’n feddal. Ychwanegwch y garlleg a’u ffrio am 2 funud arall ac yna ychwanegu’r cymysgedd tatws a phannas ynghyd â’r dail persli a’i gymysgu at ei gilydd ac ychwanegu blas gyda halen môr a phupur du ac unwaith y bydd wedi oeri digon i’w drin, defnyddiwch ddwylo gydag ychydig o flawd arnyn nhw i’w ffurfio yn 8 pati hash. Gosodwch ar blât a’u gadael i oeri yn yr oergell am 30 munud.

6. Ysgeintiwch ddwy ochr y patis hash gyda’r blawd, gan ysgwyd unrhyw flawd dros ben oddi arnyn nhw.

7. Cynheswch yr olew sy’n weddill mewn padell ffrio a gan weithio fesul swp, ffrio’r patis hash am 5–6 munud ar bob ochr tan maen nhw’n euraidd ac yn grimp. Trosglwyddwch nhw ar blât yn y ffwrn i’w cadw’n gynnes rhwng sypiau.

8. Berwch sosban fawr o ddŵr hallt, troi’r gwres i lawr tan fod y dŵr yn ffrwtian a thorri’r wyau i’r dŵr yn ofalus, fesul un a’u gadael nhw i botsio am 4–5 munud tan mae’r gwyn wedi’i goginio ond y melynwy’n dal yn feddal. Tynnwch nhw’n ofalus o’r dŵr gyda llwy rychog, gan ddraenio unrhyw ddŵr.

9. Pentyrrwch 2 o’r patis hash ar ben ei gilydd a’u gweini gydag wy wedi’i botsio a’r creision pannas a thatws. Ysgeintiwch olew olewydd drostynt, ynghyd â’r fflochiau tsili, ac ychwanegu blas gyda phupur du a’u gweini gyda lletem o lemon.

   Bydd y creision llysiau yn cadw mewn cynhwysydd aerglos ar dymheredd ystafell am hyd at 1 wythnos.

   Gallwch rewi unrhyw batis hash ychwanegol mewn cynhwysydd sy’n addas ar gyfer y rhewgell a’u dadmer a’u hail gynhesu tan eu bod yn chwilboeth cyn eu gweini.